KUBAKA JAMA'A YA KIYISILAMU I MADINA
ADHKAAR No 761 yo kuwa 10/09/2026 = 28/Rabi'ul Awwal/1448 KUBAKA JAMA'A YA KIYISILAMU I MADINA Assalamu alaykum wa rahmatullahi wa barakatuh. IRIBURIRO Bitangijwe ku bw'izina ry'Imana Nyirimpuhwe, Nyirimbabazi, Umugenga w'umunsi w'ingororano, Imana imwe rukumbi, itarabyaye kandi itarabyawe, hakaba nta na kimwe cyahwana na Yo; gushimwa no gusingizwa ni ibyayo. Amahoro n'imigisha nibisakare k'uwasozereje intumwa n'abahanuzi, Muhammad (S) n'umuryango we. Adhkaar iheruka yatwibukije kuri "D'awa mbere ya hijra" intego yari ukugaragaza mu ncamake bimwe mu bigeragezo bikomeye intumwa y'Imana (S) n'abayikurikiye bahuye na byo mu myaka 13 yambere y'ubutumwa. Iya none iratwibutsa "Kubaka Jama'a ya Kiyisilamu i Madina" twibukiranya mu ncamake umurimo utoroshye na zimwe mu mbogamizi zikomeye intumwa y'Imana (S) n'abamukurikiye bahuye na zo. KUBAKA JAMA'A YA KIYISILAMU I MADINA. Intumwa y'Imana (S) igeze i Madina mu mwaka wa mbere hijiriya yakiriwe n'imbaga y'abayisilamu mu cyubahiro gikomeye, mu rukundo n'urukumbuzi rwinshi. Yimukira i Madina yari ifite intego zikurikira: ▪ Guhunga itotezwa no kujya kuba ahari amahoro n’ituze byatuma abayisilamu bagena imigambi y’imibereho n’iterambare nta guhigwa no gutotezwa kubera ukwemera, ▪ Kwamamaza ubutumwa bwa kiyisilamu mu bwigenge n’ubwisanzure cyane ko abanyayathribu babwakiraga neza, ▪ Guhuza abayisilamu bari baratataniye hirya no hino no kubaka ubumwe n’ubuvandimwe hagati yabo ngo babashe kubaho mu muco mwiza n’ubupfura nk’uko idini yabo yabibigishaga.
Intumwa y'Imana (S) yihutiye kunga amoko abiri y'abanyamadina (nyamuke: Awsi na nyamwinshi: Khazraji) yahoraga ashyamiranye. Imaze kunga abanyamadina, yahuje Ansaru na Muhajiruna mu masezerano y'ubuvandimwe ('Aqdul Mu-akha).
Adhkaar ni ubutumwa bw’umuryango Ansar Allah ku banyamuryango. Page 2
"Nibashaka kukuryarya, menya ko Imana iguhagije. Ni Yo yaguteye inkunga iragutabara iguha n'abemera bagutabara, inahuza imitima yabo. N'iyo uza gutanga ibiri mu isi byose, ntiwari guhuza imitima yabo. Ariko Imana yarabahuje. Ni ukuri rwose Imana ni Nyirimbaraga n'icyubahiro." Kor-ani 8:62-63
"Mufatane urunana ku mugozi w'Imana mwese hamwe, ntimuzatatane. Mwibuke ingabire z'Imana kuri mwe ubwo mwari abanzi, igahuza imitima yanyu, maze ku bw'ingabire zayo mukaba abavandimwe. Mwari no ku nkengero z'umuriro irawubakiza. Uko ni ko Imana ibasobanurira amagambo yayo kugira ngo mube mwayoboka." Kor-ani 3:103. Dore urugero rw'abahujwe muri ubwo buvandimwe : No. Muhâjiru Ansâru Umuryango Ubwoko 01. Muhammad ibn Abdullah 'Aliy ibn Abi Tâlibu Bombi Muhâjiru Quraishi 02. Hamza ibn Abdul Muttalibu Zayidi ibn Hâritha Bombi Muhâjiru Quraishi 03. J’afar ibn Abi Tâlibu Mu’âdhi ibn Jabali Banu Udayyi Khazraji 04. Salmâni Al Fârsy Abu Darda Banû Hârith Khazraji 05. Mus’ab ibn Umayr Abu Ayyub Al Ansari Banu Najjâr Khazraji 06. Abû Bakri ibn Abi Quhâfa Khârija ibn Zaidi Banu Hârith Khazraji 07. 'Umari ibn Al Khattâbi 'Utbâni ibn Mâlik Banu Sâlim Khazraji 08. Uthmâni ibn Affâni Awsi ibn Thâbit Banu Najjâr Khazraji 09. Abdurahmâni ibn 'Awfu S'âdi ibn Rabî'a Banu Hârith Khazraji 10. Talha ibn 'Ubaydullah K'abu ibn Mâliki Banu Salama Khazraji 11. Zubayiri ibn Al Awwâmu Salama ibn Sallam Banu Ash-hal Awsi 12. Abu 'Ubayda ibn Al Jarâhi S'âdi ibn Mu'âdhi Banu Ash-hal Awsi 13. Abu Dharri Al Ghifâri Manzari ibn 'Umari Banu Sâ'ida Khazraji 14. Ammâri ibn Yâssiri Hudhayfa Al Yamâni Banu Najjâr Khazraji 15. Arqan ibn Abd Manafu Abu Talha Banu Najjâr Khazraji
Adhkaar ni ubutumwa bw’umuryango Ansar Allah ku banyamuryango. Page 3
Intumwa y'Imana (S) imaze kunga abanyamadina (Ansaru) n'abimukira (Muhajiruna) no kubahuriza mu buvandimwe bukomeye cyane, yahuje abari batuye Madina yose, bose bagirana amasezerano y'uko buri tsinda rigize abatuye Madina rifite ubwigenge mu byaryo, rikagira n'inshingano yo kubanira neza abandi no gutabara igihugu igihe gitewe. Bose bemeranyijwe ko intumwa y'Imana Muhammad (S) ari yo mukuru w'igihugu cyose cya Madina. Ayo masezerano ahuza abatuye Madina bose yiswe itegekonshinga rya Madina (Sahîfatul Madina = Madina Charter). Mu mwaka wa mbere mu kwezi kwa rabi'ul-awwal intumwa y'Imana (S) yubakishije umusigiti waje kuyitirirwa (Masjidu Nabbawi). Kubaka uwo musigiti byari bigamije kubona ikigo mberabyose (Multipurpose Centre): ▪ Kubona aho gusengera amasengesho yose ku bagabo n'abagore, ▪ Guhuza abayisilamu no gushimangira ubumwe n'ubuvandimwe bwabo, ▪ Gukoreramo imirimo yose y'ubuyobozi n'ubutabera, kurema inama zinyuranye, ▪ Kubona aho kwigira amasomo anyuranye, gucumbikira abanyeshuri baturuka kure n'abatishoboye (Ahlu Sufa), kwakiriramo abashyitsi n’intumwa zinyuranye ... ▪ Waje no kuba aho gutegurira gahunda zinyuranye zo kwirinda no kwivuna umwanzi mu bihe byakurikiyeho, ubwo Imana yari imaze guha abayisilamu uburenganzira bwo kwirwanaho biringiye inkunga y'Imana.
"Abarwanywa bahawe uburenganzira bwo kwirwanaho kuko bahugujwe, kandi rwose Imana ishoboye kubatabara". Kor-ani 22:39 UMUSOZO: Intumwa y'Imana (S) imaze kwimukira i Madina ihunze itotezwa ry'abanyamakka, ntiyabonye amahoro kuko mu mwaka wa 2 abahakanyi bagabye igitero cyo kurimbura ubuyisilamu. Urugamba rwabereye i Badri muri Km 350 uvuye i Makka na Km 150 ivuye i Madina. Cyahuje abayisilamu 313 n'abanyamakka 950. Cyaguyemo intwari z'abayisilamu (Ahlul Badri) 14 n'abahakanyi 70 n'abandi 70 bagirwa imbohe. Mu mwaka ukurikiyeho abanyamakka bongeye gutera ari 3,000 bahanganye n’abayisilamu 700 gusa. Imirwano ikomeye yabereye ku musozi wa Uhudi mu nkengero za Madina. Hapfuye abahakanyi 37 n'abayisilamu bahowe Imana (Shuhadâ-u) basaga 70. Ibitero by'abahakanyi byarakomeje kugeza mu mwaka wa 8, intumwa y'Imana (S) imaze gufata umurwa wa Makka nta mirwano ikanatanga imbabazi rusange ku barwanyi b'abanyamakka basaga 3,000. Mu bihe byakurikiyeho amoko menshi yayobotse ubuyisilamu nta ntambara. Wassalamu alaykum wa rahmatullahi wa barakatuh. Ansar Allah.